महाराष्ट्र 14 न्यूज, (दि.१६ऑगस्ट) : विवाहित प्रियकराने लग्नास नकार दिल्याच्या रागातून प्रेयसीने त्याचा खून केल्याची घटना पुण्यातील चिंचवडमध्ये समोर आली आहे. प्रेयसीने विवाहित प्रियकराला लॉजवर बोलवून कायमचा काटा काढला. पैगंबर गुलाब मुजावर असे खून झालेल्या प्रियकराचे नाव आहे. तर 29 वर्षीय प्रेयसीला पिंपरी पोलिसांनी बेड्या ठोकल्या आहेत. या प्रकरणी मयत पैगंबर याच्या पत्नीने पिंपरी पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, पैगंबर आणि आरोपी तरुणी हे दोघे जण एकाच ठिकाणी कामाला होते. वर्षभरापूर्वी त्यांच्यात प्रेमसंबंध निर्माण झाले. पैगंबर हा आरोपी तरुणीला भेटायला जात नव्हता. तसेच त्याने लग्न करण्यासही नकार दिला होता. याच कारणावरुन त्याचे प्रेयसीशी वारंवार वाद होत होते.
दोन दिवसांपूर्वी प्रेयसीने पैगंबर याला चिंचवड स्टेशन येथील व्हाईट हाऊस लॉजमध्ये भेटायला बोलावले. त्यानंतर सायंकाळी सहा वाजताच्या सुमारास ओढणीने गळा आवळून त्याचा खून केला. रात्री दहा वाजताच्या सुमारास तिने पैगंबर बेशुद्ध पडल्याचे लॉजमधील कर्मचाऱ्यांना सांगितले. त्यांनी पैगंबर यास तातडीने वायसीएम रुग्णालयात दाखल केले. मात्र उपचारापूर्वीच त्याचा मृत्यू झाल्याचे डॉक्टरांनी घोषित केले. पोलिसांनी 29 वर्षीय प्रेयसीला बेड्या ठोकल्या आहेत.
4 Comments