महाराष्ट्र 14 न्यूज : पिंपरी – चिंचवड महापालिका सेवेतील व सेवानिवृत्त अधिकारी , कर्मचारी यांच्या सेवाकाळात व निवृत्तीनंतर येणारे आजार व त्यावरील उपचार याच्यासाठी २०१५ पासून ‘ धन्वंतरी स्वास्थ्य योजना ‘ सुरू आहे . या सेवेकरिता कर्मचाऱ्यांच्या मासिक पगारातून काही हिस्सा व बाकी रक्कम महानगरपालिकेची अशी ही योजना मात्र बंद करण्याचा निर्णय आयुक्त श्रावण हर्डीकर यांनी घेतला आहे . या निर्णयाविरोधात पिंपरी – चिंचवड महानगरपालिका कर्मचारी महासंघाच्या कर्मचाऱ्यांनी मंगळवारी ( ता . ८ सप्टेंबर ) महापालिका प्रवेशद्वारावर काळ्या फिती लावून दिवसभर काम करीत, पिंपरी – चिंचवड महानगरपालिका कर्मचारी महासंघाचे अध्यक्ष अंबर चिंचवडे आणि सरचिटणीस सुप्रिया सुरगुडे यांच्या नेतृत्वाखाली कर्मचाऱ्यांनी निषेध नोंदवला .
अंबर चिंचवडे म्हणाले , “की १ सप्टेंबर २०१५ पासून धन्वंतरी स्वास्थ्य योजना सुरू आहे . मात्र , आयुक्त श्रावण हर्डीकर यांनी कुठलीही पूर्वसूचना न देता अचानक १४ सप्टेंबर २०२० पासून रात्री १२ नंतर ही योजना स्थगित करण्याचा निर्णय घेतला आहे . या गोष्टीचा निषेध नोंदविण्याकरताच काळी फित लावून कोरोनाच्या या संकट काळात कोणाचीही गैरसोयी होऊ नये म्हणून कामकाज सुरू ठेऊन निषेध करत आहोत”.
ही योजना बंद करण्यासाठी महानगरपालिकेच्या वतीने आदेश काढण्यात आले आहेत, यात आयुक्तांनी म्हटले आहे की, सर्व पॅनेलवरील रुग्णालयांनी १५ सप्टेंबरच्या पहाटे एकनंतर धन्वंतरी योजनेतील कोणत्याही सभासदांना या योजनेअंतर्गत उपचाराकरिता दाखल करून घेऊ नये. आयुक्तांच्या या निर्णयाला कर्मचारी महासंघाने तीव्र विरोध केला आहे . कोरोनाच्या महामारीत ‘धन्वंतरी स्वास्थ योजना’ ही वैद्यकीय योजना कर्मचाऱ्यांसाठी लाभदायक आणि कर्मचाऱ्यांच्या हिताची ठरत होती . प्रशासनाने कोरोनाच्या संकट काळात ही योजना बंद करणे अतिशय चुकीचे आहे . आयुक्तांनी हा निर्णय मागे घ्यावा . अन्यथा कर्मचाऱ्यांच्या वतीने आणखी तीव्र आंदोलन करण्यात येईल असा इशारा महासंघाच्या वतीने ‘अध्यक्ष अंबर चिंचवडे’ यांनी दिला आहे .
6 Comments