महाराष्ट्र 14 न्यूज : शारदीय नवरात्रौत्सव सुरक्षित वावराचे नियमाचे पालन करून साजरा करण्याच्या सूचना प्रशानसाने दिल्या आहेत . करोना अद्याप नियंत्रणात आला नसल्याने नवरात्रात मंदिरे बंदच राहणार आहेत . सांस्कृतिक , सामाजिक कार्यक्रम होणार नाहीत . त्यामुळे भाविकांनी यंदाचा उत्सव साधेपणाने साजरा करावा , असे आवाहन विविध मंदिर प्रमुखांनी केले .
शनिवारी ब्रह्म मुहूर्तावर घटस्थापना करून नवरात्र उत्सवास भाविकांच्या अनुपस्थितीत यंदा प्रारंभ झाला आहे. विविध धार्मिक कार्यक्रमाने घटस्थापना होत असते. पण यंदा कोरोनाच्या पार्श्वभूमीवर योग्य ती खबरदारी घेतली जात आहे. शनिवारी सकाळी विधिवत पूजा करून घटस्थापना करताच मंदिर बंद करण्यात आले होते. नऊ दिवस केवळ पूजा केली जाणार असल्याचे पुजारी मंगेश दिवाण यांनी सांगितले.
औधोगिक नगरी असलेल्या पिंपरी चिंचवडच्या सौदर्यात भर घालणाऱ्या नवी सांगवीतील महालक्ष्मी मंदिराचे शिल्पसौंदर्य काही अप्रतिमच आहे . मंदिराच्या गाभाऱ्याची रचना अगदी सुरेख आहे. महालक्ष्मीची मूर्ती चतुर्भुज आहे, वरच्या एका हातात गदा आहे , एका हातात ढाल आहे . खालच्या उजव्या हातात मातुलिंग , तर डाव्या हातात पानपात्र आहे . देवीच्या मुकुटावर शिवलिंग आहे . त्यावर नागफणा आहे . देवीचे वाहन सिंह आहे . कपाळी हळदी कुंकवाचा मळवट भरलेला आहे . नाकात नथ आहे. अंगावर भरजरी पैठणी आहे . देवीचे हे वैभवशाली रूप आदिशक्ती सगुण साकाराचे दर्शन घडविते. त्यामुळे साक्षात कोल्हापूर ला येऊन ‘अंबा’ मातेचे दर्शन घेतल्याचे समाधान लाभते, असे येथे येणारे भाविक सांगतात.
शुभायास्तु महालक्ष्मीर्भवतां भवतारिणी । बिभ्रती शिरसा लिंगमशेषा घौघहारिणी ।।
“ महालक्ष्मीची नित्योपासना पहाटे पाच वाजता सुरू होते . रात्री अकरा वाजता शेजारती होते. देवीच्या चरणांवर दुग्धाभिषेक केला जातो आणि नित्योपासना सुरू होते . दुग्धाभिषेकानंतर गंध , पुष्प व वस्त्रादी उपचारांनी देवीची पूजा केली जाते . काकडा आणि कापूर लावून देवीला ओवाळले जाते , ही आरती सकाळी ७ .३० वा. आणि सायंकाळी ७ .०० वाजता केली जाते. दुपारी १२ वाजता महानैवेद्य दाखवला जातो ,रात्री निद्रा आरतीच्या अगोदर लोणी आणि दूध साखरेचा नैवेद्य दाखवला जातो. नंतर निद्राआरती करून देवीला झोपविले जाते. यावेळी आरती दरम्यान भक्त मंदिराबाहेरुन देवीचे दर्शन घेत असताना दिसले. कोरोनाच्या काळात अशीच काळजी भक्तांनी घ्यावी हीच अपेक्षा …
13 Comments