महाराष्ट्र 14 न्यूज : कोरोना संसर्गाच्या पार्श्वभूमीवर गेल्या सात महिन्यांपासून बंद असलेली पुणे शहरातील उद्याने येत्या १ नोव्हेंबरपासून खुली करण्याचा निर्णय घेण्यात आला असून याबाबतचा आदेश महापालिकेकडून लवकरच काढला जाईल , अशी माहिती पुण्याचे महापौर मुरलीधर मोहोळ यांनी दिली आहे . कोरोना संसर्ग सुरु झाल्यापासून शहरातील सर्व उद्याने बंद ठेवण्यात आली होती . मात्र आता कोरोना संसर्ग बऱ्यापैकी आटोक्यात येत असताना उद्याने खुली करण्याचा निर्णय घेण्यात आला आहे . कोरोना संसर्ग नियंत्रणात असला तरी अटी आणि शर्थीच्या आधारावर उद्याने खुली केली जाणार आहेत.
गेल्या सात महिन्यांच्या कालावधीत पुणेकरांनी महापालिका प्रशासनाला उत्तम सहकार्य केले . त्यामुळे कोरोनाचा संसर्ग आता पूर्णपणे आपल्या नियंत्रणात आहे . त्यामुळे काही नियम घालून उद्याने सुरु करण्याचा निर्णय आपण घेत आहोत . ते नियम तंतोतंत पाळणे आवश्यक असल्याचं महापौर मोहोळ म्हणाले . केंद्रीय पथकाने शहरातील कोरोना संसर्गाचा आढावा घेतल्यानंतर डिसेंबर जानेवारीमध्ये कोरोनाची दुसरी लाट येण्याची शक्यता वर्तवली आहे .
या पार्श्वभूमीवर उद्यानात वावरताना पुणेकरांनी योग्यप्रकारे आपली काळजी घ्यावी . काळजी उत्तम प्रकारे घेतल्यास आपल्याला कोरोनाची दुसरी लाट थोपवण्यात सहज यश मिळू शकते , असं मोहोळ म्हणाले . जून महिन्यात राज्य सरकारने लॉकडाऊन ५ च्या नियमावलीत सूट दिली असताना पुण्यातील १ ९९ पैकी १५० उद्याने सुरु करण्याचा निर्णय महापालिकेने घेतला होता . मात्र पहिल्या काही दिवसांतच नागरिकांनी घालून दिलेले नियम न पाळल्याने महापालिकेने उद्याने पुन्हा एकदा बंद करावी लागली होती .
21 Comments