पहाटे गाढ झोपेत कुटुंबावर काळाचा घाला, चिखलीत आगीत होरपळून चौघांचा मृत्यू

महाराष्ट्र 14 न्यूज, (दि.३० ऑगस्ट) : पिंपरी चिंचवड शहरातील चिखली भागात एक धक्कादायक घटना घडली आहे. पहाटे गाढ झोपेत असताना एका कुटुंबावर काळाने घाला घातल्याची माहिती समोर आली आहे. आज बुधवारी (ता. 30 ऑगस्ट) पहाटे चिखलीत असणाऱ्या एका हार्डवेअरच्या दुकानाला भीषण आग लागली. या आगीने पहाटे काही वेळातच रौद्र रुप धारण केले. ज्यामुळे या आगीच्या भक्ष्यस्थानी दोन चिमुकल्यांचा आणि त्यांच्या आई-वडिलांचा जागीच मृत्यू झाला. सदर घटनेची माहिती मिळताच अग्निशमन दलाने घटनास्थळी धाव घेत आगीवर नियंत्रण मिळवले, परंतु या चौघांनाही या आगीत आपले प्राम गमवावे लागले. 

मिळालेल्या माहितीनुसार, पिंपरी चिंचवडमधील चिखली भागात सचिन हार्डवेअर नावाचे दुकान होते. या दुकानातच चौधरी कुटुंब वास्तव्यास होते. परंतु, आज पहाटे या दुकानाला आग लागली आणि या आगीत चौघांचा होरपळून मृत्यू झाला. चिमणाराम चौधरी, ज्ञानुदेवी चौधरी, सचिन चौधरी (वय वर्ष 10) आणि भावेश चौधरी (वय वर्ष 15) असे या आगीत मृत पावलेल्यांची नावे आहे. या घटनेनंतर परिसरातील नागरिकांकडून हळहळ व्यक्त करण्यात येत आहे.

आग लागलेल्या दुकानामध्ये ऑईल पेंट असल्याने या आगीने काही क्षणातच रौद्ररूप धारण केल्याचे सांगण्यात आले आहे. या ऑईल पेंटमुळे बंद दुकानामध्ये वायू निर्माण झाला आणि ज्यामध्ये गुदमरून या चौघांना आपला जीव गमवावा लागला असल्याचे सांगण्यात येत आहे. मुळ राजस्थानचे असलेले चौधरी कुटुंब हार्डवेअरचे दुकान चालवून आपला उदरनिर्वाह करत होते आणि याच दुकानाच्यावर असलेल्या माळ्यावर ते वास्तव्यास होते, अशी माहिती समोर आली आहे. दरम्यान, शॉर्ट सर्किटमुळे ही आग लागल्याचा प्राथमिक अंदाज व्यक्त करण्यात आला असून सदर घटनेची माहिती अग्निशमन दलाल मिळाल्यानंतर त्यांनी तत्काळ घटनास्थळी धाव घेतली. ज्यानंतर या आगीवर नियंत्रण मिळवून कुलिंगचे काम सुरू असल्याची माहिती देण्यात आली आहे.