“खड्डा दिसला तर फोटो काढा, ठिकाण नोंदवा” … पिंपरी चिंचवड महानगरपालिकेने आतापर्यंत २,२४७ पैकी १,७३३ खड्डे बुजविले; उर्वरित खड्डे बुजविण्याचे काम युद्धपातळीवर सुरू

 

महाराष्ट्र 14 न्यूज, पिंपरी, दि. १७ ऑगस्ट २०२६ :* पिंपरी-चिंचवड महानगरपालिकेच्या स्थापत्य विभागाच्या अहवालानुसार, शहरातील एकूण २,२४७ खड्ड्यांपैकी १,७३३ खड्डे बुजविण्यात आले असून ५१४ खड्डे बुजविणे बाकी आहे. आतापर्यंत एकूण ७७.१३ टक्के खड्डे बुजविण्यात आले असून उर्वरित खड्डे बुजविण्याचे काम युद्धपातळीवर सुरू आहे.

प्रभागनिहाय पाहता, अ प्रभागातील १४० पैकी १२१, ब प्रभागातील १०९ पैकी ८०, क प्रभागातील १४१ पैकी १२४, ड प्रभागातील २३४ पैकी २१५, इ प्रभागातील ४५९ पैकी ३३०, फ प्रभागातील १५१ पैकी १०९, ग प्रभागातील २५९ पैकी १७०, ह प्रभागातील ११८ पैकी ८७, ज प्रभागातील ५६ पैकी ५१ आणि त प्रभागातील ३३२ पैकी ३०५ खड्डे बुजविण्यात आले आहेत.

तसेच शहरी दळणवळण विभागातील २४० पैकी १३३, तर स्थापत्य प्रकल्प विभागातील ९ पैकी ८ खड्डे बुजविण्यात आले आहेत. नागरिकांच्या सुरक्षिततेच्या दृष्टीने उर्वरित खड्ड्यांवरही प्राधान्याने कार्यवाही करण्यात येत आहे.

स्मार्ट सारथी पीसीएमसी ॲपवर खड्ड्यांची तक्रार नोंदवा

शहरातील रस्त्यांवरील खड्ड्यांची माहिती महापालिकेपर्यंत तातडीने पोहोचविण्यासाठी स्मार्ट सारथी पीसीएमसी ॲपमध्ये ‘खड्डे नोंदवा’ ही सुविधा उपलब्ध करून देण्यात आली आहे.

नागरिकांनी रस्त्यावर खड्डा आढळल्यास स्मार्ट सारथी पीसीएमसी ॲपवरून त्याची तक्रार नोंदवावी. तक्रार नोंदविताना नागरिकांना खड्ड्याचा फोटो, जीपीएसद्वारे अचूक ठिकाण, पत्ता तसेच खड्ड्याचा अंदाजे आकार नोंदविता येतो. तक्रार दाखल झाल्यानंतर संबंधित विभागाकडून प्रत्यक्ष पाहणी करून आवश्यक कार्यवाही करण्यात येते.

तक्रारदाराला तक्रार क्रमांक उपलब्ध होत असून, त्याद्वारे तक्रारीची सद्यस्थिती ऑनलाइन पाहता येते. खड्डा दुरुस्त झाल्यानंतर तक्रार बंद करून त्याबाबतची माहिती संबंधित नागरिकाला उपलब्ध करून देण्यात येते.

नागरिकांनी गुगल प्ले स्टोअर किंवा ॲपल ॲप स्टोअरवरून स्मार्ट सारथी पीसीएमसी ॲप डाउनलोड करून, पीसीएमसी सेवा → खड्डे नोंदवा हा पर्याय निवडून खड्ड्यांची माहिती महापालिकेपर्यंत पोहोचवावी, असे आवाहन करण्यात आले आहे.

“खड्डा दिसला तर फोटो काढा, ठिकाण नोंदवा आणि स्मार्ट सारथी पीसीएमसी ॲपवर तक्रार करा; सुरक्षित रस्त्यांसाठी महापालिकेच्या प्रयत्नांना सहकार्य करा,” असे आवाहन आयुक्त डॉ. सूर्यवंशी यांनी केले आहे.