महाराष्ट्र 14 न्यूज, (दि.२० फेब्रुवारी) : पिंपरी-चिंचवड मधील तरूणांनी दरवर्षी प्रमाणे यावर्षीही हिमालय ट्रेक करत अनोख्या पद्धतीने छत्रपती शिवाजी महाराज जयंती साजरी केली. यावर्षी तरुणांनी देवभूमी उत्तराखंड राज्यातील १२,२५० फूट उंचीवरील ‘ब्रह्मताल ट्रेक’ पूर्ण केला.
संपूर्ण बर्फाच्छादीत व अवघड असा हिमालयातील ट्रेक पिंपरी चिंचवड मधील या तरूणांनी ५ दिवसात शिवजयंतीच्या दिवशी भगवा झेंडा फडकवत पूर्ण केला. हे सर्वजण मागील तीन महिन्यांपासून फिटनेसची तयारी करीत होते. या ट्रेकमध्ये निलेश जगताप, डॅा. किशोर सात्रस, डॅा. प्रशांत वाखारे, उद्योजक दत्ता गवारे, तुषार पाचर्णे व अमोल तावरे यांनी सहभाग नोंदवला.
उत्तराखंडच्या चमोली जिल्ह्यातील थराली ब्लॉकमध्ये स्थित ब्रह्मताल ट्रॅक हे एक सुंदर पर्यटन स्थळ आहे. सुंदर नजारे पाहण्यासाठी देश-विदेशातील पर्यटक येथे येतात. उत्तराखंडमधील प्रत्येक धार्मिक किंवा पर्यटन स्थळाशी काही ना काही कथा किंवा आख्यायिका निगडीत आहे. त्यामुळेच येथील पर्यटन आणि धार्मिक स्थळांना देश-विदेशात वेगळे महत्त्व आहे. ब्रह्मतालाबाबत असे म्हटले जाते की, बेडनी बुग्यालमध्ये वेद रचण्यापूर्वी भगवान ब्रह्मदेवांनी येथे असलेल्या तलावाजवळ बसून अनेक वर्षे ध्यान केले.
साहसी आणि निसर्गप्रेमींसाठी, ब्रह्मताल ट्रेक हा एक अविस्मरणीय ट्रेक असू शकतो. ब्रह्मताल शिखराच्या माथ्यावरून तुम्हाला नंदा घुंटी, त्रिशूल पर्वत आणि बेथरटोली हिमालय यांसारखी हिमालयातील काही प्रचंड शिखरे पाहायला मिळतात. ब्रह्मताल ते नंदा देवी रज्जतच्या रूपकुंड तलावापर्यंतच्या ट्रेक मार्गाचे विहंगम दृश्यही दिसते.
ब्रह्मताल ट्रेक दरम्यान जट्रोपाणी टॉपचा आणखी एक ट्रेक करता येतो. येथे पोहोचल्यानंतर, तुम्ही सहज चालत अंतर पार करून हिमालयातील उंच शिखरे आणि तलाव पाहू शकता. हा परिसर भोज पत्र (भोज पत्र ज्याला सनातन धर्मात विशेष महत्त्व आहे, कागदाचा शोध लागला नव्हता तेव्हा यांवर इतिहास लिहिला गेला होता), ब्रह्म कमल यासह अनेक दुर्मिळ औषधी वनस्पतींचे भांडार आहे.
हा भाग वर्षातील 8 महिने बर्फाने झाकलेला असतो. ब्रह्मताल ट्रेक दोन दिवसातही करता येतो. पण हा ट्रेक या ठिकाणी जगायचा असेल तर किमान पाच दिवसांचा ट्रेक आहे. ब्रह्मताल ट्रेक करण्यासाठी एप्रिल ते जून आणि सप्टेंबर ते डिसेंबर दरम्यान सर्वोत्तम वेळ आहे.
