पिंपरी चिंचवड महानगरपालिका क्षेत्रातील सर्व माध्यमांच्या शाळांतील इयत्ता १ ली ते ८ वी चे नियमित वर्ग सोमवार पासून सुरु

महाराष्ट्र 14 न्यूज, (दि.०५फेब्रुवारी( : जगभरात कोरोना विषाणूचा नवा प्रकार ओमायक्रॉन ( Omicron ) आढळून आला असून व जागतिक आरोग्य संघटना ( W.H.O. ) ने सदर विषाणू प्रकारास Variant of Concern म्हणून जाहीर केले आहे . सदर विषाणूचा संसर्ग मोठया प्रमाणात होऊ नये यास्तव या विषाणू विरोधी प्रतिबंधात्मक उपाय योजना व आवश्यक ती खबरदारी घेणे आवश्यक आहे . त्यामुळे राज्यातील शाळा बंद ठेवण्यात आल्या होत्या. त्या सुरू करण्याचे आदेश स्थानिक पातळीवर देण्यात आले आहेत.

१) पिंपरी चिंचवड महानगरपालिका क्षेत्रातील सर्व माध्यमांच्या शाळांतील इयत्ता १ ली ते ८ वी चे नियमित वर्ग ( पूर्ण सत्र कालावधीत ) दिनांक ०७/०२/२०२२ पासून सुरु राहतील .

२ ) पिंपरी चिंचवड महानगरपालिका क्षेत्रातील कोचिंग क्लासेस ( Coaching Classes ) , स्पर्धा परीक्षांचे क्लासेस हॉलच्या आसन क्षमतेच्या ५० % क्षमतेने सुरु राहतील . मात्र सदर ठिकाणी कार्यरत असणारे प्रशिक्षक व कर्मचारी यांचे कोविड प्रतिबंधात्मक लसीकरणाचे दोन मात्रा ( डोस ) पूर्ण झालेले असणे अनिवार्य राहील.

३ ) संदर्भीय आदेशान्वये वेळोवेळी निर्गमित केलेले आदेश / मार्गदर्शक सूचना पुढील आदेशापर्यंत लागू राहतील . कोविड १ ९ च्या प्रतिबंधासाठी या कार्यालयाद्वारे वेळोवेळी निर्गमित करण्यात आलेल्या आदेशांचे , मार्गदर्शक सूचनांचे उल्लंघन करणारी व्यक्ती आपत्ती व्यवस्थापन कायदा २००५ चे कलम ५१ ते ६० , तसेच भारतीय दंड संहितेचे कलम १८८ नुसार अन्य कायदेशीर तरतुदीनुसार कारवाईस पात्र राहील .

सदर आदेश दि . ०७.०२.२०२२ पासून पुढील आदेशापर्यंत पिंपरी चिंचवड महानगरपालिका कार्यक्षेत्रात लागू राहतील . असा आदेश पिंपरी चिंचवड आयुक्त राजेश पाटील यांनी दि . ०५.०२.२०२२ रोजी दिलेला आहे .