महाराष्ट्र 14 न्यूज, (दि.२५ ऑक्टोबर) : पिंपरी, चिंचवड आणि भोसरी या तिन्ही विधानसभा मतदारसंघातील महायुतीचे उमेदवार ठरले असताना महाविकास आघाडीत कोणता मतदारसंघ कोणत्या पक्षाकडे राहणार, हे चित्र आज रात्री उशिरा स्पष्ट झाले . महाविकास आघाडीने आगामी विधानसभा निवडणुकांसाठी आपली उमेदवारांची यादी जाहीर केली आहे. भोसरी, पिंपरी आणि चिंचवड या चार महत्त्वाच्या मतदारसंघांतील निवडणुकीसाठी उमेदवारांची अधिकृत घोषणा करण्यात आली आहे.
भोसरीत राष्ट्रवादी काँग्रेसच्या शरद पवार गटाचे अजित गव्हाणे, चिंचवडमधून शिवसेना (उ बा ठा) गटाचे राहुल कलाटे, तर पिंपरी चिंचवडमधून सुलक्षणा धर यांना उमेदवारी देण्यात आली आहे. चिंचवडमध्ये खासदार अमोल कोल्हे यांनी राहुल कलाटे यांच्या तिकीटासाठी जोरदार प्रयत्न केले, अशी चर्चा राजकीय वर्तुळात आहे. यामुळे या मतदारसंघातील राजकीय हालचालींना वेग आला आहे.
भोसरीत उद्धव गटाचे इच्छुक उमेदवार रवी लांडगे यांचा पत्ता कट झाल्याने त्यांच्या समर्थकांमध्ये नाराजीचे वातावरण आहे. काही समर्थकांनी सोशल मीडियावर “फिक्स आमदार” व “भावी आमदार” अशा पोस्ट केल्या होत्या, परंतु आजच्या यादीत रवी लांडगे यांचे नाव वगळण्यात आले. उमेदवारी न मिळाल्यामुळे भोसरीत आता लांडगे बंड करतील का, यावर चर्चा रंगू लागली आहे. महाविकास आघाडीतील सर्व कार्यकर्ते एकत्र येऊन अजित गव्हाणे यांच्या प्रचाराला साथ देतील का, हे पाहणे उत्सुकतेचे ठरणार आहे.