पिंपरी चिंचवड शहरातील H3N2 चा संसर्ग नियंत्रणात आणण्यासाठी आमदार अश्विनी जगताप यांची प्रतिबंधक उपाययोजना बाबत आयुक्तांबरोबर तातडीची बैठक

महाराष्ट्र 14 न्यूज, (दि.१६ मार्च) : राज्यात H3N2 च्या संसर्गाचे प्रमाण वाढत आहे. पिंपरी-चिंचवडमध्ये एका ७३ वर्षीय वृद्धाचा यात पाहिला बळी गेल्याची धक्कादायक माहिती समोर आली. त्यामुळे चिंचवड च्या नवनिर्वाचित आमदार अश्विनी लक्ष्मण जगताप या मुंबईहून तातडीने पिंपरी-चिंचवडकडे रवाना झाल्या आहेत.

वास्तविक, मुंबईत राज्य विधिमंडळाचे अर्थसंकल्पीय अधिवेशन सुरू आहे. त्यानिमित्त आमदार अश्विनी जगताप या मुंबईत आहेत. पिंपरी चिंचवड शहरातील विविध प्रश्नांसदर्भात पाठपुरावा करून ते सोडवून घेण्यासाठी त्या अधिवेशनात होत्या. परंतु आपल्या नागरिकांवर आलेले संकट महत्वाचे आहे, उपाययोजना करणे आपले कर्तव्य आहे त्यामुळे त्या अधिवेशन सोडून पिंपरी चिंचवड मध्ये दाखल झाल्या आहेत.

आमदार अश्विनी जगताप यांनी महापालिका आयुक्त तथा प्रशासक शेखर सिंह यांच्याची बैठक नियोजित केली असून, संसर्ग रोखण्यासाठी प्रभावी उपाययोजना आणि प्रशासनाच्या तयारीचा आढावा घेण्यात येणार आहे. महापालिका आरोग्य, वैद्यकीय विभाग आणि रुग्णालय प्रमुखांसह संबंधित अधिकारी आणि महापालिका आयुक्त शेखर सिंह यांच्यासोबत महत्त्वपूर्ण बैठक होणार आहे. यामध्ये शहरातील H3N2 चा संसर्ग नियंत्रणात आणण्यासाठी प्रतिबंधक उपाययोजना करण्यात येणार आहेत.

काय म्हणल्या, आमदार अश्विनी जगताप :

त्यांनी शहरात एच३एन२ संसर्ग वाढू नये यासाठी वैद्यकीय आणि आरोग्य विभागाला सतर्क राहण्याचे आदेश दिले. तसेच महापालिकेच्या सर्व रुग्णालयांमध्ये एच३एन२ संसर्गाच्या रुग्णांवर उपचारासाठी सर्व व्यवस्था उभारण्यास सांगितले. कोणाच्याही आदेशाची वाट न पाहता तातडीने उपचार व्यवस्था निर्माण करण्यास त्यांनी सांगितले. त्याचबरोबर महापालिकेने केलेल्या उपाययोजनांचा आढावा घेण्यासाठी त्यांनी बैठक नियोजित करण्याची सूचनाही आयुक्त शेखर सिंह यांना केली आहे. तसेच या आजाराबाबत नागरिकांमध्ये भितीचे वातावरण पसरू नये यासाठी कोणती काळजी घेण्यात यावी याबाबत जनजागृती करण्यासही त्यांनी आयुक्तांना सांगितले आहे.