जिल्हा रुग्णालय औंध, पुणे येथे हेल्थ विदिन रिच फाउंडेशन आणि प्रज्ञादीप सोशल फाउंडेशन यांच्या सहकार्याने स्तन कर्करोग तपासणी शिबिराचे आयोजन

महाराष्ट्र 14 न्यूज, (दि.२१ जानेवारी) : २१ जानेवारी २०२५ रोजी जिल्हा रुग्णालय औंध पुणे यांनी हेल्थ विदिन रिच फाउंडेशन आणि प्रज्ञादीप सोशल फाउंडेशन यांच्या सहकार्याने स्तन कर्करोग तपासणी शिबिराचे आयोजन केले, जिथे हेल्थ विदिनरीच फाउंडेशनच्या अत्याधुनिक मोबाईल डिजिटल मॅमोग्राफी व्हॅनद्वारे मोफत मॅमोग्राफी तपासणी करण्यात आली.

स्तनाचा कर्करोग शोधण्यासाठी मॅमोग्राफी ही सर्वोत्तम नॉन-इनवेसिव्ह स्क्रीनिंग प्रक्रियांपैकी एक आहे. आणि स्तनाचा कर्करोग होण्याचा धोका असलेल्या महिलांची तपासणी करण्यास मदत करते.

जागतिक आरोग्य संघटना ४० वर्षांपेक्षा जास्त वयाच्या सर्व महिलाना दरवर्षी स्क्रीनिंग मॅमोग्राफी करण्याचा सल्ला देते ज्यामुळे स्तनाचा कर्करोग असलेल्या महिलांमध्ये लवकर निदान आणि त्वरित उपचार होण्यास मदत होते व कॅन्सर मुळे होणारे मुत्यू रोखता येतात.

या शिबिराचे उद्घाटन औंध पुणे येथील जिल्हा रुग्णालयातील जिल्हा शल्यचिकित्सक डॉ. नागनाथ येम्पल्ले यांच्या हस्ते करण्यात आले. यावेळी डॉ. रेखा पेटकर, डॉ. सुरेखा चावरिया, डॉ. अनिल संतपुरे, डॉ. राजाभाऊ थोरात, डॉ. देविदास शेलार, डॉ. किरण खलाटे, डॉ. पारधे, डॉ. विक्रम काकडे, श्रीमती ढाकणे अधिसेविका, श्रीमती. सुप्रिया किरीड , श्रीमती वैशाली गायकवाड उपस्थित होते.  प्रज्ञादीप सोशल फाउंडेशनचे डॉ. प्रकाश रोकडे यांनी या आयोजना मध्ये पुढाकार घेतला आणि हेल्थ विदिन रिच फाउंडेशनचे डॉ. मुदस्सर शेख, रुपाली फुलबंदे , शुभम कांबळे, स्नेहा सोनवणे यांनी डिजिटल मॅमोग्राफी व्हॅनची आवश्यकता पूर्ण केली.

या शिबिरात सर्व महिलांना स्तनाच्या कर्करोगाबद्दल जागरूक करण्यात आले आणि स्वतः स्तन तपासणी करण्यास शिकवण्यात आले. यावेळी सुमारे ६० महिलांच्या स्तनाच्या कर्करोगाची तपासणी करण्यात आली, त्यापैकी १ रुग्णाला कर्करोगाशी संबंधित बदल आढळले आणि ३ महिलांना संशयास्पद गाठी आढळल्या. या २५ महिलांची जिल्हा रुग्णालय औंध येथील शस्त्रक्रिया विभागाकडून बायोप्सी आणि उपचार केले जातील. जिल्हा शल्यचिकित्सक डॉ. येम्पल्ले, जि.रु. पुणे येथे ऑन्कोलॉजी युनिट स्थापन करण्यासाठी प्रयत्नशील असल्यामुळे रुग्णांसाठी शस्त्रक्रिया आणि केमोथेरपी उपलब्ध करण्यात आलेली आहे.

स्तनाचा कर्करोग होण्याच्या जोखमीच्या घटकांमध्ये लठ्ठपणा , शारीरिक व्यायामाचा अभाव , अल्कोहोलचे सेवन, रजोनिवृत्तीदरम्यान हार्मोन रिप्लेसमेंट थेरपी , आयनीकरण रेडिएशन , पहिल्या मासिक पाळीच्या वेळी लहान वय , आयुष्यात उशीरा मुले होणे (किंवा मुळीच नाही), मोठे वय, यांचा समावेश होतो.

स्तनाचा कर्करोग सामान्यतः दुधाच्या नलिकांच्या अस्तरांच्या पेशींमध्ये आणि या नलिकांना दुधाचा पुरवठा करणाऱ्या लोब्यूल्समध्ये विकसित होतो. नलिकांमधून विकसित होणारे कर्करोग डक्टल कार्सिनोमा म्हणून ओळखले जातात , तर लोब्यूल्सपासून विकसित होणारे कर्करोग लोब्युलर कार्सिनोमा म्हणून ओळखले जातात . स्तनाच्या कर्करोगाचे १८ हून अधिक उप-प्रकार आहेत. काही, जसे की डक्टल कार्सिनोमा इन सिटू , प्री-इनवेसिव्ह जखमांमुळे विकसित होतात . स्तनाच्या कर्करोगाच्या निदानाची पुष्टी संबंधित ऊतकांची बायोप्सी करून केली जाते. अशा शिबिरांमुळे महिलांमध्ये कर्करोगा विषयी जागरूकता निर्माण होते.