महाराष्ट्र 14 न्यूज, दि.१५ डिसेंबर : राज्यात स्थानिक स्वराज्य संस्थांच्या निवडणुकीचे बिगुल वाजले, पुणे आणि पिंपरी चिंचवड महापालिकेत भारतीय जनता पक्ष राष्ट्रवादी काँग्रेस पक्षाशी युती करणार की स्वतंत्रपणे निवडणुकीला सामोरे जाणार याकडे सगळ्यांचे लक्ष लागले होते. सर्वात स्मार्ट महापालिकांपैकी एक म्हणून ओळखल्या जाणाऱ्या पिंपरी चिंचवड महापालिकेच्या आगामी निवडणुकीच्या पार्श्वभूमीवर शहरात राजकीय घडामोडींना आता वेग आला आहे.
तसेच निवडणूक आयोगाने राज्यातील २९ महापालिका निवडणुकांची घोषणा केल्यानंतर प्रथमच मुख्यमंत्री देवेंद्र फडणवीस (Chief Minister Devendra Fadnavis) यांनी प्रतिक्रिया देताना पुणे महापालिका निवडणुकीत भाजप आणि राष्ट्रवादी काँग्रेस हे दोन्ही पक्ष आमने सामने लढतील असे जाहीर केले.
पिंपरी चिंचवड महापालिकेवर मागील काही वर्षांपासून भाजपची एकहाती सत्ता आहे. ही सत्ता पुन्हा कायम राखण्यासाठी भाजपने आगामी महापालिका निवडणूक स्वबळावर लढवण्याची घोषणा केल्यानंतर विरोधकांच्या हालचालींना गती मिळाली. तर भाजपला सत्तेपासून रोखण्यासाठी राष्ट्रवादी काँग्रेस आणि शिवसेना एकत्र येण्याची शक्यता आता जवळपास निश्चित मानली जात असून, यामुळे शहराच्या राजकारणात नवं समीकरण तयार झालं आहे.
सुरुवातीला अजित पवार गटाची राष्ट्रवादी काँग्रेस आणि शरद पवार गटाची राष्ट्रवादी एकत्र येण्याची चर्चा होती. मात्र दोन्ही राष्ट्रवादी काँग्रेस पुन्हा एकत्र येण्याची शक्यता धूसर झाल्यानंतर पर्यायी राजकीय आघाडीचा विचार सुरू झाला. याच पार्श्वभूमीवर आता पिंपरी चिंचवडमध्ये बलाढ्य भाजपला टक्कर देण्यासाठी राष्ट्रवादी काँग्रेस आणि एकनाथ शिंदे यांच्या नेतृत्वाखालील शिवसेना एकत्र निवडणूक लढवणार असल्याची माहिती समोर आली आहे. जरी ही युती सत्तेसाठीची तडजोड वाटत असली, तरी या नव्या समीकरणामुळे दोन्ही पक्षांना फायदा होईल, असा विश्वास दोन्ही बाजूंच्या कार्यकर्त्यांनी व्यक्त केला आहे.
तर पुणे महानगरपालिका निवडणूकित पुणे शहरात महाविकास आघाडी एकत्र लढण्याच्या हालचालींना वेग आला आहे. तर आमच्या एकत्र लढण्याने विरोधकांना फायदा होणार असल्याने आम्ही वेगवेगळे निवडणुकीला सामोरे जाऊ, अशी घोषणा मुख्यमंत्री देवेंद्र फडणवीस यांनी केली. ते पुण्यात बोलत होते.
